Psa 27 | KYG | STEP | Ala kava ne'mo ha le ya'nimo aepa vekamo mai'neno nagufamo alino katino ne'nateya vekamo mai'niya'mofe'mo ina lagife'mo koli'apimo huguve. Ala kava ne'mo himamu'nimo aepa vekamo mai'niya'mofe'mo ina lagife'mo atete huguve.

Psalms 27

Ala kava ne'mo'a naha maesige'na ae'na apakasegauve, huno hu'niya gemae

1 Ala kava ne'mo ha le ya'nimo aepa vekamo mai'neno nagufamo alino katino ne'nateya vekamo mai'niya'mofe'mo ina lagife'mo koli'apimo huguve. Ala kava ne'mo himamu'nimo aepa vekamo mai'niya'mofe'mo ina lagife'mo atete huguve. 2 Hosu vaya'mo kame vaya'nimogi nagaetegamo hosu kava'mo nehaya vaya'mogimo nagufamo nahae'a nesayafe'mo nagaetegamo e'apae'mo apago'ya fai'a asagau'a ai'nae. 3 Asole vaya'mogimo kame hu'a natesayafe'mo e'a mai'nisage'nae'mo naipamo'mo atete osugiye. Kame hu'a natesayana naipamo'mo lokiya vaigiye. 4 Nagaemo Goti'a magoke ya'mo alino namisiyafe'mo nahau'niyanage'na ani ya'mo alisuvafeke'mo kahauya huguve. Nagaemo Ala kava ne'mo nopi'mo muki afa'a maisuva afina'mo mai'ne'na Ala kava ne'mo konali ya'amo aulu he'na agete'nae'mo alopa mono no'afi'mo mai'ne'na ge hu'na afi gesuvafe'mo maigesuve. 5 Hanageke ya'mo afole aisiya afina'mo alino fala kino natege alopa mono no'afi'mo alino fala kino natege huteno yatala yafate'mo nasaga huno faino nategaiye. 6 Nagaemo kame vaya'nimo ae'na apakasete'na alopa mono no'afi'mo ofalinimo amite'na alopa gefati'mo nehu'nae'mo namogaga aiguve. Ala kava nefeke'mo alopa gefati'mo yokemo hute'na agi'ale'mo ali'na asaga huguve.

7 Ala kava nene, hu'na, kagaefe'mo keya ae'na ge hisugekae'mo ge'nimo afiyo. Kahau huka nateteka ge'nile'mo aeka atagaina huka naha paiyo. 8 Kagaemo nagaefe'mo hukae'mo nagaefe'mo kahauya hulika eno huka nehanage'nae'mo kagaefe'mo nagaemo kahauya huli'na uguve, hu'na nehuve.

9 Kaugosamo alika fala kili'neka kaipamo leka nateteka ali'yakamo ne'aluva vekamo naha faika o'natalo. O Gotiyo, hu'na, naha mae'nananagi kakame'yamo namiteka nataleka o'uvo. 10 Ita'ni afo'nila'moganimo anakame'yamo namisa'ana Ala kava ne'mo'a yagaino nategaiye. 11 Kame vaya'nimo mai'nayanagi kagae ka'mo nave lige'na agetesugeka ani kate'mo navalelika uvo. 12 Kame vaya'nimogi aigofe gemo huge kamagigune hu'a huge nehayanagi navaleka apayapi'mo o'apamiyo. 13 Nagaemo ofali'na afa'a mai'nisugeno Ala kava ne'mo'a alagepa ya'amo alino namigiye, hu'na nagesamo afi'na fatago nehuve. 14 Ala kava nefeke'mo agava maiyo. Lokiya vaitapa mai'nigeno'ao lokiya vaino lapateno. Ala kava nefeke'mo agava maiyo, hu'na nehuve.